筆記《雷雨》（Part 1）

對唔少觀眾嚟講，著名粵語片《雷雨》（1957）幾乎等於所有老土情節嘅代名詞。除咗少年時期李小龍演出能夠成為話題，一般嚟講，呢部粵語片其他表現，無論編劇、演員、拍攝等技術都極少被提及。其實又難怪，比如對筆者嚟講，雖然完全唔熟悉曹禺，但係原著「雷雨」話劇架構裡面，因為封建思想及制度壓迫所導致嘅亂倫悲劇﹣﹣即係愛人其實係親人呢個設計﹣﹣早已經被人重複仿效到入曬腦，所以一聽見所謂 “雷雨” 式嘅倫理悲劇，就知道意思係貶意，係老土嘢同會打曬喊路。簡單講，因為“阿哥條女原來係阿妹” 呢條橋比人抄得多，造成觀眾先入為主嘅印象。而最壞影響，係忘記咗呢個印象成為老土之前，本身係有創作源頭，有出處，而且之後比人跟風，仲能夠流行起嚟，必定有原因、有質素先會做到。

幸好通過『粵語片研究會』，先至有機會協力策劃『電影資料館』節目（註1）。因為選片同其他相關工作，而要重新翻睇好幾次《雷雨》之後，發現呢部粵語片無論從劇本、演出到拍攝技巧，質素之高令人驚訝、懾服。
不得不承認，從認知到判斷，從前忽略咗討論呢部粵語片，絕對係無知同完全錯誤。

改編「雷雨」原著成為電影版，一直以來有兩個版本經常被提及同比較。先係前文所講，1957年粵語片版本，電影屬於張瑛、謝益之成立嘅『華橋電影企業公司』創業作，吳回導演，程剛編劇，白燕、盧敦、張瑛、梅綺、李小龍主演 。另一部係1961年國語片版本， 『香港鳳凰影業公司』出品，朱石麟（註2）編導，高遠、石慧、飽方、江漢等主演。

由於只睇過朱石麟版本一次（註3），坊間亦無影碟及其他渠道可以重溫，所以要將兩部片並置，然後反覆比較，一方面暫時做唔到，另方面亦非本文目的。不過就兩部《雷雨》成績，筆者想提出一個初步印象。過去從技術、藝術上表現，一向認為朱石麟版本較為出色，呢個睇法，似乎有非常大商榷空間。尤其結合劇場與電影語言運用，以至劇本完整性，拓寬角色深度方面等等，吳回粵語片版本《雷雨》比國語片版優勝太多。甚至應該講，兩者可觀性嘅差距相當之大。

當中落差，先係兩位導演，對如何詮釋原著重點有唔同選擇，令寫人同社會之間關係，無論出發點、關注點、方向、取捨都不一樣。朱石麟背負嘅意識形態任務包袱好大，往往人物、處境，其功用性（建立批判點）強過人性，概念嘅發揮，著重具體象徵意義多於抽象心理刻劃，所以會缺少因為故事推進，角色心理嘅演變、改變，或者點解固執不變嘅描繪。
舉個例，朱石麟版本，主場景周家大宅係封建制度縮影，每個角色，都係一種受中國傳統禮教所壓迫嘅典型，佢哋嘅功用，係突顯制度（父權意識）已經將人摧毀。“已經”意思係“結果”。即是話，有咗“結果”，就再無變化嘅可能。角色無變化，就會越接近認知上嘅“典型”（最壞情況就會變成樣板）。所以處理上，朱石麟版本已經再無（亦不需要）不停變化嘅心理活動，咁先強調到封建制度會帶嚟決定性惡果，而要阻止呢個惡果出現，前題就要先改變社會。

相反，雖然故事主軸無變，但係吳回（包括編劇程剛，攝影師孫倫）著墨最多，係經營人物性格，挖掘人裡面如果喺相同處境，可能出現嘅種種情緒，甚至互相撞擊之後嘅矛盾。所以，若果封建思想帶嚟絕對父權，吳回版本對點解會形成呢種扭曲，與及點樣影響人嘅行為、情緒等，關注特別多。而呢種關注，出發點係同情裡面角色，想了解每個人物，包括心理變化嘅理由、過程，而唔係結果。

本人愚見，導演並無強化周家大宅嘅封建象徵，佢反而捉到原故事裡面，最核心嘅人性衝擊唔係死亡，而係兩個擁有率真、誠實品格嘅年青人，點樣經歷成人世界殘酷擺佈，純真如何受傷害，然後崩塌、崩潰。以上取向，令到粵語片版本《雷雨》，不單止格外生動、富立體感，而且戲劇衝突，因為性格及關係有足夠因果去建立，所以最終一切理想、生命都全數破滅嘅悲慘結局，經過精心設計、編排嘅電影手法結合之後，感染力更強，亦更加令人信服。

基於筆者興趣，本文探討嘅部份，主要係粵語片版本《雷雨》，有關攝影、母題運用兩方面。

（待續）

註1：『香港電影資料館』2014年5月﹣7月放映節目﹣「編＋導」系列一：程剛。

註2：黃愛玲：故園春夢——朱石麟的電影人生

註3：為咗將吳回、朱石麟版本從改編上做比較，「編＋導」系列安排兩部《雷雨》同日放映。