楚原導演，徐克監製嘅《大丈夫日記》公映日期係1988年7月，票房總收入超過一千九百萬。88年之前，「工作室」電影有6部。包括84年《上海之夜》（徐克導演）、85年《打工皇帝》（徐克導演）、86年《英雄本色》（吳宇森導演）、《刀馬旦》（徐克導演）、87年《倩女幽魂》（程小東導演）、《英雄本色 II》（吳宇森導演）。
「工作室」嘅製作，好多時會喺舊電影裡面搵題材。比如吳宇森嘅《英雄本色》，從片名、基本架構，都取自67年龍剛執導嘅經典粵語片。《英雄本色》88年票房嚇親人，竟然收超過三千四百萬！成績比起同年一齊排暑假檔，負責守尾門嘅《刀馬旦》收入足足多出一倍！套戲除左充滿動感嘅推軌鏡頭、慢鏡開槍之外，對香港政治上嘅隱喻，對昔日光輝嘅緬懷，以至係咪「中英聯合聲明」帶嚟嘅陰影所致，而引起觀眾共鳴成為票房傳奇呢？當時呢個討論好熱烈。不過無論結論係乜都好，「工作室」（加上吳宇森）嘅創意，其中一樣就係重提粵語片嘅代表性、重要性。起碼我自己，如果唔係因為86年《英雄本色》，就唔會識得注意龍剛。
喺「工作室」創意十足嘅旗幟下面，加上喜劇片仍然佔據主流，令到楚原再次有機會打開「大丈夫」日記。
相隔24年，電影裡面嘅「大丈夫」，身處嘅世界、人品，都已經完全唔同。
88年《大丈夫日記》戲一開始，主角周正發（周潤發）就輕輕鬆鬆咁，剖白佢中學嘅志願：「我希望自己有六架賓士，有幾棟樓收租，有個好靚嘅老婆，身材係36、22、36，個樣要好似南紅咁。」
然後周正發交待，原來有一晚，真係比佢遇到夢中情人。嗰晚佢揸住部紅色開蓬跑車，就喺中環一場大雨之下，巧合識左兩個索女；一個係時裝店老闆，叫祖兒（王祖賢）；另一個做空姐，叫莎莉（葉蒨文）。
話都無咁快，周正發就分別同兩個正女好親密。而既然兩個都咁正，煩惱就嚟嘞：咁同邊個結婚好呢？然後陰差陽錯，總之佢就兩個都應承左。但係重婚好大鑊㗎嘛！所以周正發就先同祖兒去美國註冊，跟住再同莎莉到巴黎結婚。當莎莉唔使番工飛歐洲，兩個都喺香港嗰陣，就靠同事兼老友志雄（李子雄），夾計呃住是但一邊，總之務求兩個老婆，永遠唔知有對方存在。
《大丈夫日記》成部戲，楚原再玩一次紙包唔住火。雖然周正發出盡九牛二虎之力去欺瞞，最終都係穿晒煲！兩個索女不單撞到正，而且仲聯手向大話精報復，結果搞到口腫面腫，完全一頭煙。
做個比較，幾有趣。
1964年《大丈夫日記》，主角江德信喺洋行打工，雖然受重用，不過相信有唔錯嘅經濟背景，都係穩穩定定工作得嚟。江德信專一，亦無娶妾嘅與趣，估計又唔算貪錢，最多想同啲朋友發下白日夢嗰種。88年版本，周正發嘅職業係做股票行，睇個樣應該好成功。做股票好成功，即係見慣大起大落。周正發都好熱衷講大話， 佢曾經形容要維持兩段婚姻，只要唔比美國同歐洲個市停就得。個意思係，晚晚話兩邊個市有問題，要番公司開工，然後奔波兩頭住家呃住先。即係扮做嘢，扮專一。
我唔覺64年主角，江德信識用份工嚟呃女，反而佢老闆龍雙田（姜中平）就會咁做。龍雙田唔止背住老婆想搞嘢，仲會擺架子去欺壓啲職員，個人好衰下。對比88年主角，周正發喺股票行做到咁高位，如果做事行穩陣嘅話，一早無得升，所以佢嘅投機能力一定唔低。加上周正發個人好古惑下，即係正牌識撈，間中仲會用上司壓迫下屬嘅手法，夾硬要志雄幫拖呃女仔。
更有趣嘅係，64年兩集粵語片嘅戲劇張力，就係來自唔想（唔應該）娶兩個老婆。而兩集道德觀，都係建基於認同誠實，否定瞞騙呢個道理。
相反，88年版戲劇重點，係定位於點樣先可以，有多過一個（或更多）老婆。而裡面嘅道德觀係一種不確定，好模糊嗰種。比如因為有錢、有權，好多嘢就會得到。個人貪慾強，亦唔算會比人鬧。而有兩個老婆，係煩啲，不過睇落真係好開心。
所以比較之下，可能80年代能夠得到觀眾認同，有資格做主角嘅係64年反派龍雙田呢種人。起碼番睇嗰陣，發覺最好睇都係，周正發搞餐懵，左呃右呃搏大霧，然後又可以照樣擁抱兩個索女。況且，爆煲都無咩損失，頂多比人質幾搥。
倒過嚟講，想專一，行正派嘅志雄，佢角色就變左江德信。為左保住女友信任同飯碗，死撐到尾。
到呢一刻，作為觀眾好明白。講事業有成，梗係周正發做股票叻過志雄，因為慾望大，乜都想要嘅人，先會喺中環撈到成功（電影最後，志雄仲威過周正發，喺中東娶左四個老婆）。
落得徐克監製個名，難免影響好大。最明顯係《大丈夫日記》嘅戲劇節奏。
基本上，套戲一開始就無停過去橋，好密集嘅設計同扭橋，音樂差不多貫穿頭同尾。無咩透氣位，靜位更加無。所以講熱鬧，絕無冷場係事實。呢點好徐克，你睇《蜀山》到《刀馬旦》等等就知，佢喜好要好多橋，橋要去得快，不停扭不停變，一鼓作氣衝到尾。
但係話講描寫感情，《大丈夫日記》就弱好多。比如講周正發好愛兩個老婆，又或者兩個老婆好愛佢，其實就無咩實際寫過，就算有都係好片段性，話左係就當係，無認真建立過。
諗番，其實「愛」咁大鑊嘅嘢，《大丈夫日記》用戲裡面一場玩得好開心，狂想式歌舞戲，好老實咁解釋左涵意：就係王祖賢、
葉蒨文咁靚，點捨得放！呢種MV式嘅「愛」，目的都係等觀眾有個藉口，比靚女迷已經係愛情，然後好放心咁去幻想呢個醒目仔贏晒嘅美夢。
講真，套戲散橋咁密，根本唔夠時間寫感情線，又或者80年代咁風光，有錢玩左先，笑左先，太認真觀眾就無左娛樂，搵自己笨。
重溫《大丈夫日記》，一方面我承認套戲好有親切感。諗番起當時，有唔少人都幻想過「有六架賓士，有幾棟樓收租」之類，套戲反映左時代裡面普遍人對成功嘅定義。另一方面，部戲拍攝上嘅整體表現亦相當好，因為楚原、徐克，喜劇手法有近似嘅喜好，都鐘情用複雜嘅錯摸設計，將覆水難收嘅喜劇效果迸發，呢點令到電影喺佢兩位一監一導底下，明顯好夾，好有默契。
比如64年《大丈夫日記》（下集）最後一幕嘅醫院大混亂。啲人走嚟走去，
好忙咁講一個大話補鑊另一個大話。每個色角都以為大話過到骨，點知轉過頭又唔得，嗰種慌失失，喺啲病房度左閃右避，結果搞到一鑊粥嘅設計，處理同徐克嘅《上海之夜》有唔少共通。睇過嘅都唔會忘記，《上海之夜》有一幕用賊仔入屋做引子，等幾個主角為愛與被愛去玩收埋或者坦露，好忙咁又碌地又閃入衣櫃又企高又縮低，徐克將呢場愛情嘅隱藏遊戲做到草木皆兵一樣，好過癮。
呢個玩法去到88年，當周正發被迫要同莎莉去祖兒屋企食飯，成場戲就好似開正楚原飯數，而且監製又鐘意呢亭嘢，所以兩個嘅合作，效果真係神采飛揚。
講講下，不如跳番去1969年。呢一年，楚原嘅電影生涯裡面
，已經參與過72部電影。當時新成立嘅「新電影製片公司」推出左部《冷暖青春》。演員有曾江、朱江、南紅、張清等等。監製沈殿霞、曾江、楚原。製片南紅。編導係楚原。根據資料所寫，編導、製片同主要演員都係「新電影」嘅股東，各人都期望《冷暖青春》可以挽救日漸消沉嘅粵語片。
楚原講，其實68、69年，粵語片已經到左山窮水盡嘅地步。
國語片嘅強勢已經成為事實，楚原亦開始為「國泰」拍攝國語片。而就算「邵氏」時期，雖然有講粵語，起用電視演員大賣嘅《七十二家房客》，但係之後製作電視改編劇嘅電影，好似《朱門怨》、《新啼笑姻緣》都唔賣錢，只有《香港73》好少少。楚原話：拍一部仆一部，拍一部仆一部。
75年國語片《大劫案》之後，最多人記得，就係楚原拍左好多古龍小說改編嘅武俠片，嗰種迷離而抽象嘅氣氛，的確令人印象深刻。到左離開「邵氏」拍《花心紅杏》，楚原自己都承認已經OUT左，因為啲戲再唔賣座。
直到《大丈夫日記》，先至有較為好嘅票房。
楚原咁講過：徐克幫左佢。
Very nice !
