《黃飛鴻威震五羊城》（FB筆記）

睇【黃飛鴻威震五羊城】感覺到王風同司徒安班底為應對時代嘅改變而開啟一個黃飛鴻片嘅新階段，部片1968年我先剛剛出世，而60年代無論香港至整個世界都經歷緊巨變，尤其青年文化對權威嘅不信任以至從政治到思潮都作出關鍵性撼動，可以想像到「黃飛鴻系列」如果要繼續延伸，主角嘅定位、心態同道德界線必然要重新調節先至可以喺市場再接受挑戰。

現下能夠睇到嘅【威震五羊城】版本雖部分缺聲同隱覺非最後定稿，不過縱觀嚟講成績唔平均，有D道中氣窒住窒住咁，唔係好順同唔夠放。

但係當去到過左三份二後，我開始明白或者王風班底要喺部片嘅思想、情感到形式明顯有個過度去改變，要一方面留住舊影迷（所以中後段之前保留住從拍攝到內容嘅傳統味）另一面要比新世代觀眾知道今時唔同往日，所以黃飛鴻除左武功好又富家長味又對自己人惡又識得忍外，佢會懷疑自己會落寞會比人教訓同點醒所認同嘅禮教可能係盲目固執(仲要係比女仔當面炳佢懦弱），最後佢對住神主牌涕淚交流叫屈叫苦反省左一晚，然後一腳踩地決心走出更新嘅一步，從呢段戲之後成部片生晒，深入虎穴被重重圍困嘅設計去得緊湊又爽，同石堅嘅決戰稱得上生死肉搏，拍攝嘅機位有遠有近做到要攞命同保命嘅攻勢。其次我諗，曾江都幾關鍵，佢嘅身體語言喺呢個系列片突出到反叛個性，即係話講D嘢頂撞師傅，呢亭人先夠薑（曹達華嘅梁寬感覺無咁忠於自己）再者【威震五羊城】有柳青反串做鬼腳七，青年男女多番D好氣氛D同時代氛圍近D，王風佢哋都算搞左唔少嘢去希望觀眾領會到新方向嘅魅力。

暫時最深印象仍然係【黃飛鴻浴血硫礦谷】，故仔到人物到映像都一流，從前VCD睇過，好期待大銀幕嘅重溫。

3月25日夜晚帶住因早起，又叫到喉痛兼疲累嘅身體喺資料館走出嚟，諗起呢日壞人當道，野心長期被壓抑嘅失敗者完成騙局走上權力高台。【威震五羊城】裡面黃師傅講（大意）：係嗰D壞人迫我走出嚟！

究竟有幾多人走到出嚟呢？究竟有幾多人願意表達憤怒而唔係無奈呢？所謂香港神話，就好似張劇照咁，正被壞到透嘅人輕蔑、羞辱、擺佈同玩弄。

經過左一夜可能有嘅心痛同難過，1968年嘅黃飛鴻走出更新嘅一步，2012嘅香港，希望你都會！

筆記於2012年3月26日FACEBOOK。