粵語講粵語片．丁瑩

想睇睇丁瑩資料，偶然搵到「Youtube」兩段電台錄音，錄音年份屬於64年《大丈夫日記》推出之前，所以索性一邊聽，一邊整理同上網，補充番啲資料寫低，等有用嘅時候作參考用。

丁瑩原名季景鈺，浙江人，1938年香港出生。

丁瑩自小已經係個大影迷，唔單止迷睇戲，仲好鐘意收藏明星相，比如白燕、紅線女、黃曼梨等等。

讀緊書嘅丁瑩，係因為隔離同學睇到報紙，見到「自由影業公司」（「嶺光影業公司」前身）招聘電影《女兒心》（秦劍導演．1954）女主角，同學撩佢試下投考而踏入影壇。

由於讀緊嘅「聖嘉勒女書院」係一間校風嚴格嘅天主教學校，所以丁瑩就算比同學講多幾講諗住試考，都係靜靜雞唔比人知嗰種。後來真係比佢入到圍，但係丁瑩當時太年輕，得15歲女，所以「自由影業」覺得，不如先比少女丁瑩到現場體驗下，睇下嘢先，因為學習要一步一步嚟，唔急得。而《女兒心》女主角就由同期投考成功嘅林翠擔任。

丁瑩參演嘅第一部影片係國語片，叫《馥蘭姐姐》（莫康時導演．1956．據資料所寫，故事改編自著名小說『小婦人』）。套戲裡面有四姊妹，丁瑩負責演一個善良而又體弱多病嘅三家姐，最後重因為救人自己病死埋。一齊演出仲有，做大家姐嘅楊雯、二家姐林翠、四妹由一個叫丹妮嘅小妹妹飾演。楊雯同丹妮都係同期加入「自由影業」。

丁瑩第二部戲係喜劇，叫《銀燈照玉人》（ 李應源導演．1955．國語版名《終生大事》）。而因為拍攝《日月潭之戀》（莫康時導演．1956）、《馬車夫之戀》（唐紹華導演．1956），丁瑩第一次出門，同林翠、黃河、劉恩甲等人一齊去台灣取景拍攝，加埋後來完成一部彩色國語片《甘蔗姑娘》（李應源導演．1958），咁逗留台灣四個月嘅工作就算結束。番香港之後，丁瑩再拍左幾部國語片。之後為左影片《小野貓》（黃卓漢導演．1958），丁瑩隨片三個月到馬來亞登台，往後去埋泰國暹羅宣傳之後，先正式投入拍攝粵語片。

《三女性》（ 莫康時導演． 1960），丁瑩第一部粵語片，演員仲有羅艷卿、顧媚同林家聲。

丁瑩作為「嶺光」基本演員，一直有接受表演訓練，比如唱歌跳舞。心底喜歡演悲劇嘅佢，為左做好第一部武俠片《武林十三劍》（黃鶴聲導演．1961），亦曾經學習北派功架。

1962年，「嶺光」同韓國公司「漢陽映畫社」合作，拍攝改編自『西遊記』嘅《火燄山》（莫康時導演．1962）。部片屬於香港首部伊士曼色彩特藝綜合闊銀幕粵語片。丁瑩做鐵扇公主，同場演出有韓國影帝崔茂龍、影后金芝美。為左解決言語不通問題， 對白方面，劇本分中文、韓文兩個版本 ，因為已經清楚雙方對白位置，現場拍攝嗰陣，香港演員可以講中文，韓國演員講韓文。

電影《火燄山》有國、粵、韓三種語言版本，特技部份日本拍攝，最後奪得「韓國藝術文化振興會」：最佳合作演出獎、最佳演技獎：丁瑩、漢城大學編劇榮譽獎。

往後除左《卿何薄命》（李鐵導演．1963）《香海情潮》（黃卓漢導演．1963），丁瑩仲喺《她的遭遇》裡面，嘗試演繹女主角從15至50歲嘅一生。

＊文字根據「Youtube」影片之聲音編寫。

＊相關資料來自「電影資料館」網站。

＊《她的遭遇》未有網上資料。

＊聲音來源：

「香港麗的呼聲電台」．「銀色電台」節目《戲劇生涯》

主持鄭孟霞

節目時段：星期一、星期四、晚上8：45

聲音錄製時間（Youtube顯示資料）：1963年4月8日．星期一．晚上

Youtube錄音：

鄭盂霞訪問丁瑩（Part 1)

鄭盂霞訪問丁瑩（Part 2)

「 大丈夫日記 X 3 」筆記（中)

楚原口述歷史提到過，1964、65年，佢拍片數目最多，曾經試過一年拍十四部電影，寫十四個劇本。

《大丈夫日記下集》64年12推出，距離上集中間有7個月時間。期間，楚原有四部戲搞緊， 分別係《糊塗太太》、《死亡角之夜》、《情海幽蘭》、《魂斷奈何天》。

若果論整體拍攝，《大丈夫日記》上集比下集仔細。上集從構圖、分鏡，以至劇本、燈光、服裝等，都平均而起伏有序，喺粵語片範疇，上集達到一定精緻程度。而下集嘅開拍，應該係因為上集受歡迎，所以要快快手，整多一部添食。

楚原工作排到咁密，個期又趕，照道理製作《大丈夫日記下集》，路線應該行簡單、穩陣嗰種。不過事實上，下集嘅拍攝手法好唔簡單，尤其後半部份。轉場、剪接、調度好頻密，同場演員又多，仲差不多每個都有戲。楚原喺下集，將群戲錯摸玩到好盡。

所謂藝高人膽大。前提，技藝唔高根本玩唔到。我諗（八九不離十），楚原受嘅訓練、磨鍊，執行下集構想不過係濕濕碎，有幾難。不過對我嚟講，就睇到眼都突，寫個服字。拍得住佢嘅技藝，比如玩複雜錯摸，我估，只有後來徐克導演先做到。

下集主題講「生仔」，而故事，其實係由粵語片一個傳統題目：「不孝有三．無後為大」做開始。

離鄉多年，江德信（張英才）二叔江敬老（駱恭）因為無生細路，老婆又早死，所以急急由美國番香港，召開家族會議，希望講服江德信兩公婆，底諗啲生多個仔，過繼比佢。

江德信本身，已經有個七歲仔家樂（安偉璉），而老婆許雪心（南紅）好注重家庭計劃，有感生得多未必好，「教又難養又難」。所謂一條心，兩個早有協議，暫時一個夠數。

江德信唔想為江敬老「生仔過繼」，不過始終係長輩，唔知點推好。談判其間因為誤會，江敬老以為許雪心有家樂之後死左機，無仔生。江德信見咁情況，不如索性將錯就錯，承認老婆無得再大肚。

江敬老諗無可諗，決定用長輩身份加鄉下例，迫江德信開第二部機，即係娶多個老婆做平妻，用嚟生仔。

江德信個人好專一下，又唔想兜口兜面拒絕老人家，唯有拖住先，之後再想辦法。

娶平妻單嘢，因為江敬老就快番美國，想快啲搞，免得心掛，所以就託人搵到一個，好典型嘅貪錢阿媽做交易，將個女葉滿枝（梅蘭）嫁比江德信。

葉滿枝其實有個男友陳千仲（張清），可惜條友衰無錢，所以兩個結唔到婚。

老公就快多個老婆，許雪心都唔知點算好。好姊妹方天心（李香琴）就獻計，橫掂江敬老就快走，不如扮有左，咁就無藉口迫佢老公即時納妾。

到呢處，粵語片喜劇手法之一，啲角色總係會烏鳥龍龍，將件事越搞越禍。

首先，江敬老知道許雪心大肚，就更加唔想走。方天心見唔對路，就建議不如搵巫日明（林彬）老婆，懷左孕嘅劉多多（林艷）幫手，搞互換身份。

紙包唔住火，本來江德信都以為老婆真大肚，當知道係流料，加上江敬老好得閒，決定等埋BB仔出世先番歸，情況變得好大鑊。一向多計嘅江德信，諗到不如串通根本唔想嫁佢，做護士嘅葉滿枝，喺醫院搵個相鄰病房，等許雪心同劉多多隨時偷龍轉鳳，呃晒會嚟睇BB同產婦嘅兩邊家長。

到中後段醫院戲，係高潮所在。所有前面老作嘅大話同誤會，到呢處逐一穿煲。 總之每個人為左補鑊，前言不對後語，喺兩間病房走嚟走去，搞到亂七八糟。

楚原技藝叻嘅地方，係活用幾個簡單場景，包括，醫院上層、下層；電梯到走廊；兩個病房距離。然後透過人物進出場景嗰陣，製造時間上誤差，將緊湊、慌張，唔知點算好嘅喜劇效果，逐漸累積，再累積，繼而一次過引爆。

技術上，連計頻繁嘅反應鏡頭，醫院戲嘅剪接點，超過一百七十個。所有演員走位、調度，成場無停。甚至同場演出人數，多起嚟去到二十人，將畫面塞到滿。

就咁睇，都唔好講拍，嗰種複雜、瑣碎嘅程度，無番咁上下功力，根本頭都暈埋。加上楚原玩細節好強，除左原來主線部份，整套戲，佢仲插入唔少枝線，協助將喜劇效果推至盡可能大。

比如八公（高魯泉）嫌棄八婆（馬笑英）無仔生，所以佢又想娶多個，而原來八公搵嘅，又係葉滿枝老母，即係八公會同江德信爭女。而阮地龍（俞明）個懵仔，就扮流氓同醫生，越幫越忙。加埋大炮王，方天心、龍太太（羅蘭）兩個即興作故仔，直情亂吹一通，笑死。

楚原仲玩嘢到（神來之筆），無端端加個神經佬（林魯岳）逃獄戲，無厘頭得嚟，又好夾部戲已經瘋狂嘅狀態。

所以，趕歸趕，楚原落足料搞，務求做到喺娛樂上，滿足晒入場觀眾。

雖然同上集一樣，玩講大話、玩誤會、玩錯摸，但其實以「生仔」做主題嘅下集，所謂「不孝有三．無後為大」，不過係借題發揮。

楚原用左兩代人（江敬老／江德信、許雪心）去寫：新一代同上一代之間，對將來，或者點選擇自己嘅生活，有意願上分歧、矛盾、甚至衝突。但係年青一代，無採取到完全嘅對抗，而係想辦法，先安撫難以調和嘅分別。

前設係，唔好令老人家傷心，然後再諗計，有無雙方都滿意嘅結果。

講番轉頭，於我，其實《大丈夫日記下集》開場無耐，許雪心訓誡佢七歲個仔家樂，第日要識得孝順，尤其好錫佢嘅阿姨方天心。呢部份，好值得深思。

家樂番寄宿學校，每星期只番屋企一次，每次父母都預備好佢一星期需要嘅衣服同食物。對比起昔日粵語片裡面嘅小朋友，家樂幸福得多。但係同時，家樂因為寄宿，會離開屋企。期間大部份時間，家樂成長所出現嘅問題，就要自己面對。雖然佢著住一套西裝仔，好企理、乾淨，但係父母一代嘅原則、思想，就未必再解決（解釋）到，佢個人，以至外面世界嘅急劇變化。

延伸呢個聯想，究竟家樂會點踏入70、80年代呢？佢會變成一個咩人呢？家樂爸爸、媽媽兩個，同上一代嘅關係，發展到佢身上又會點呢？家樂父母，解決江敬老問題嘅方法，就係未得同意就將佢過繼比人，孝順嘅意思，係咪呢啲情況唔好拒絕，要聽話呢？甚至將來，家樂仲記唔記得有個好錫佢嘅阿姨？定抑或，佢會親阿姨比阿媽更加多呢？

正如開場之後家樂就再無出現，佢嘅未來，係另一個時代。

諗一諗，的確耐人尋味。

轉下眼，「大丈夫」去到88年，用筆寫日記都費事。傳統家庭觀念早已經崩潰。從前長輩嘅地位、意願，甚至角色都完全消失。幸福嘅指標、榜樣，係有幾多部車，有幾多層樓，有幾多個女人。所以打洋行工嘅江德信，尚算老實嘅性格、人品，唔會喺88年嘅中環生存到。換嚟嘅，係渴望左擁右抱，做股票嘅周正發（周潤發）。而許雪心代表嘅64年女性，能夠留低嘅，就只有演員南紅個名，同倒退至附加於大男人底下嘅賢淑。

所謂娛樂無窮，「大丈夫日記」進入徹底追求慾望、享樂嘅80年代。

大丈夫日記

「 大丈夫日記 X 3 」筆記（上)

「大丈夫日記」有三部，都係楚原導演。

頭兩部1964年推出。5月先有《大丈夫日記》（上集），由張英才、丁瑩、林彬、林艷主演。然後12月有《大丈夫日記》（下集），演員基本上一樣，不過女主角由丁瑩換左南紅。24年後，1988年徐克監製《大丈夫日記》，當時由「新藝城」出品、「金公主」發行、「電影工作室」攝製，周潤發、葉蒨文、王祖賢主演。睇牌面係全盛期嘅港產片陣容。

好可惜，暫時無辦法喺市面或者網上搵到《大丈夫日記》（上集），要睇就要到「電影資料館」資源中心。而《大丈夫日記》（下集）同徐克監製嘅版本就有影碟同網上版。

三部「大丈夫日記」都有特色同代表性。數番轉頭，楚原生於1934年，64年30歲，如果由1956年參與吳回導演嘅《一片飛花》（楚原編劇）計起，22歲之後8年，楚原嘅粵語片成績單已經好利害（共28部電影！），比如編劇有56年《七重天》（吳回導演）、58年《奸情》（王鏗導演）同《紫薇園的秋天》（秦劍導演），又有60年《可憐天下父母心》（楚原編導）、62年上下集《孽海遺恨》（楚原導演）、63年《含淚的玫瑰》（楚原編導）同《昨夜夢魂中》（楚原導演）。所以，到64年導演兩部「大丈夫日記」嘅楚原，技巧已經好熟練流暢，而且活潑、靈活，作風新派新潮。

今日睇番《大丈夫日記》（上集），証明楚原寫人物係有一手。例如一開場，主角江德信（張英才）個人已經好唔「大丈夫」，連屋企個工人都兇到佢。不過反過嚟講，江德信係一個好人，而且無咩脾氣，亦好愛屋企同老婆許雪心（丁瑩），甚至朝早番工會揸綿羊仔，車埋老婆一齊遊車河。

觀眾睇到嘅「大丈夫」唔係要勁要惡，而係對一家之主所謂嘅尊嚴做左諷刺（張英才先做到）。當然從背景（靚裝嘅屋企）到日常生活（較為洋化）可以睇到主角階層有一定經濟條件。所以角色嘅煩惱、情趣唔係為搵兩餐，而係點樣喺現代都市嘅白領生活裡面，維護到已經有嘅關係，化解到比如夫婦、朋友之間，可能出現嘅誤會同危機。

江德信喺洋行打工，同另外三個同事合稱「四劍俠」，包括周麒麟（鄭君綿）、阮地龍（俞明）同巫日明（林彬）。聽落以為「劍俠」好勇，其實睇佢哋個名就知流流地，呢個組合都係撞板多，而且一有事會好騰雞，會腳軟。江德信好得老闆龍雙田（姜中平）重用。姜中平做上司，都知點會正經，梗係多衰野做同好想鹹濕。佢重用江德信，因為條友腦筋轉得比較快，信得過，有鑊要補會諗到橋。

《大丈夫日記》（上集）故事圍繞嘅，就係老闆要請個「日本女」見客，專認女朋友多嘅周麒麟傻下傻下搵左個多多生子（林艷）頂檔，而多多生子不單唔係「日本女」，仲曾經有好慘嘅遭遇，加上溝唔到女嘅巫日明好鐘意多多，所以「四劍俠」要諗辦法頂住老闆想鹹濕，又要保住份工，而最後更幾乎搞到許雪心要同江德信離婚。

呢種老闆要滾女嘅故事粵語片唔少，不過楚原就強在細節同心思，比如戲中太太團有個「防止丈夫走私委員會」，甚至會發明一對鞋，會聽到夜歸男人腳步聲，叫「半夜三更鞋」。太太團嘅大家姐係龍太太（羅蘭），佢聽聞「日本女」多多生子插花勁叻，所以要佢教太太團花道，而周麒麟唯有扮識日本話頂做翻譯，幫多多亂嗡一輪，同時惡女方天冰（李香琴）又懶識野，接周麒麟再亂嗡「日本女」嘅插花藝術，成場戲好好笑，無冷場咁滯。

呢種混淆真真假假，誤會再誤會嘅玩法，甚至玩到連龍雙田屋企樓下個印度看更，原來都唔係印度人。

楚原眼中嘅城市，雖然無迫良為娼或者惡霸橫行，不過人為左保護自己，變得真偽好難去分辨。

到後段高潮戲，眾角色因為時間巧合，撞見多多同江德信喺酒店似乎有奸情。許雪心睇到，嬲到眼淚汪汪，仲摑左老公轉身走。成個戲由信任老公，到無辦法唔懷疑，中間許雪心點唔開心，都無喊過，到左人証物証江德信出軌，先至心碎流淚。

楚原從戲嘅開場就已經建立左江德信好錫老婆，所以高潮戲除左緊張又好笑之外，重點係個爛攤子搞喊左個咁信你嘅女仔，好唔得掂。

《大丈夫日記》（上集）用一個跌低嘅電話做最後一個鏡頭，而成套戲穿起種種事件就係電話頻繁嘅往來，呢個亦係楚原（敏感）聰明嘅地方。城市發展嘅進步象徵就係改善通訊速度，本來訊息傳遞快左係一種方便，但係同時家庭生活亦因為內與外嘅通訊距離縮短，而變得相聚時間無辦法延長。所以風波過後，江德信同許雪心兩公婆，會攬到實一實，電話都費事聽。

累積起豐富電影經驗嘅楚原，7個月後推出《大丈夫日記》（下集），一方面沿用人物嚟續寫之後發展，另一方面亦將錯摸喜劇，通過密集嘅群戲調度推至高峰。雖然下集換走多一份孩子氣嘅丁螢，改用南紅做許雪心，但因為戲軌圍繞娶平妻、生仔教仔，南紅嘅賢淑同母性相對比丁螢更加適合，畢竟兩夫婦要聯手講大話，有時鼓埋泡氣嘅丁瑩雖然可愛，但係就未必幫到付付碌碌嘅張英才。

WOO

「我們在過去二十年內，


對現實的感覺受到嚴重衝激，


電影數碼效果，

圖像處理軟件，


網上虛擬現實等等....


製片人有責任重新定義現實的感覺。」



荷索先生，


你的一段奧斯卡錄影講話:



「製片人有責任重新定義現實的感覺。」



woo....實在太有型了!!

致信報編輯陳景祥先生

陳景祥先生：



我「曾經」是【信報】讀者，不是短期，而是一段很長時間每天閱讀。我會將喜歡，認為有價值的文章一一剪存保留，到今天剪貼薄仍在，發黃的文章仍在。



我不懂投資，亦對金融、財經等新聞不感興趣，這方面我認定自己沒天份，悟性亦低。


但為什麼仍會看【信報】？在當年，最大原因是報內有具水準的專欄及文化評論文章，尤其涉及藝術領域各個方面的前輩與有識之士曾帶給我知識與啟發，在那謹只一版多一點的篇幅。



回想，這已經是陳年往事。不知不覺，從改版到方向到替換作者，【信報】早已退出我的生活，亦退出了我所知道眾多與我有共同要求的讀者。我會想，縱然方向改變了，所謂一流報刊的水準及追求應該多少還有所剩吧。



從網上得知，4月1日，一位叫占飛的作者文章被刊登，標題「鄧光榮蝕大本造就王家衛」。


細看內容，其文章水平、態度、品格之惡劣，令我極為憤怒！



文章以剛過身的影壇前輩為標題，但實則是先拿粵語片本身、演員及觀眾來「過橋」，字裡行間將三者貶低為品味與價值非常低質的階層，沒有資料及論據底下會作「人物造型、性格公式化，連對白都公式化。演員當然也是來來去去的那一批。製作簡 陋，但快速，所謂七日鮮也。」之斷言，更甚至將電視業、電視劇作為貶詞與貶義。


竟寫下「別用藝術的眼光去看當時的演員」，對粵語片、演員與觀眾的關係竟這樣去定性「觀眾對他們的要求很簡單，不必有什麼深刻 的演技，只要他們能如實表達出所演的「那種人」的類型，觀眾便會當他們是「自己人」。」再到寫鄧光榮先生，亦不忘亂帶粵語片一筆「只可惜粵語片意識形態保守，抗拒西化，尤其是西方的流行文化」，結未胡說八道所謂香港電影不一樣的理由「鄧光榮對香港電影最大的「貢獻」，也許是「捨身成仁」，出錢讓王家衛拍《旺角卡門》與《阿飛正傳》。他自己蝕大本，卻造就了王家衛，香港電影從此不一樣」



這樣一篇文章看得出作者對香港電影，對香港歷史的發展軌跡是完全無知，而且視野狹隘得令人震驚。



占飛的文章，對所有粵語片台前幕後的前輩、對鄧光榮先生、對所有我所認識（及不認識）而熱愛粵語片的觀眾都毫不尊重，作者甚至是先設定貶低他人，侮辱他人為前題來下筆，沒有探討沒有理據，只有狂妄、傲慢與粗野。

從水平、態度、品格惡劣至此的文章卻竟可以通過【信報】編輯的「審閱」， 其質素能夠淪落至此，所謂辦報請問還有什麼價值，意義又何在。



原來水準與追求一點也不剩了！



敢問，作為傳媒一份子，還有專業這回事嗎？還有社會責任在裡面嗎？




火炭藝術家、電影工作者


馮慶強