楚原口述歷史提到過，1964、65年，佢拍片數目最多，曾經試過一年拍十四部電影，寫十四個劇本。
《大丈夫日記下集》64年12推出，距離上集中間有7個月時間。期間，楚原有四部戲搞緊， 分別係《糊塗太太》、《死亡角之夜》、《情海幽蘭》、《魂斷奈何天》。
若果論整體拍攝，《大丈夫日記》上集比下集仔細。上集從構圖、分鏡，以至劇本、燈光、服裝等，都平均而起伏有序，喺粵語片範疇，上集達到一定精緻程度。而下集嘅開拍，應該係因為上集受歡迎，所以要快快手，整多一部添食。
楚原工作排到咁密，個期又趕，照道理製作《大丈夫日記下集》，路線應該行簡單、穩陣嗰種。不過事實上，下集嘅拍攝手法好唔簡單，尤其後半部份。轉場、剪接、調度好頻密，同場演員又多，仲差不多每個都有戲。楚原喺下集，將群戲錯摸玩到好盡。
所謂藝高人膽大。前提，技藝唔高根本玩唔到。我諗（八九不離十），楚原受嘅訓練、磨鍊，執行下集構想不過係濕濕碎，有幾難。不過對我嚟講，就睇到眼都突，寫個服字。拍得住佢嘅技藝，比如玩複雜錯摸，我估，只有後來徐克導演先做到。
下集主題講「生仔」，而故事，其實係由粵語片一個傳統題目：「不孝有三．無後為大」做開始。
離鄉多年，江德信（張英才）二叔江敬老（駱恭）因為無生細路，老婆又早死，所以急急由美國番香港，召開家族會議，希望講服江德信兩公婆，底諗啲生多個仔，過繼比佢。
江德信本身，已經有個七歲仔家樂（安偉璉），而老婆許雪心（南紅）好注重家庭計劃，有感生得多未必好，「教又難養又難」。所謂一條心，兩個早有協議，暫時一個夠數。
江德信唔想為江敬老「生仔過繼」，不過始終係長輩，唔知點推好。談判其間因為誤會，江敬老以為許雪心有家樂之後死左機，無仔生。江德信見咁情況，不如索性將錯就錯，承認老婆無得再大肚。
江敬老諗無可諗，決定用長輩身份加鄉下例，迫江德信開第二部機，即係娶多個老婆做平妻，用嚟生仔。
江德信個人好專一下，又唔想兜口兜面拒絕老人家，唯有拖住先，之後再想辦法。
娶平妻單嘢，因為江敬老就快番美國，想快啲搞，免得心掛，所以就託人搵到一個，好典型嘅貪錢阿媽做交易，將個女葉滿枝（梅蘭）嫁比江德信。
葉滿枝其實有個男友陳千仲（張清），可惜條友衰無錢，所以兩個結唔到婚。
老公就快多個老婆，許雪心都唔知點算好。好姊妹方天心（李香琴）就獻計，橫掂江敬老就快走，不如扮有左，咁就無藉口迫佢老公即時納妾。
到呢處，粵語片喜劇手法之一，啲角色總係會烏鳥龍龍，將件事越搞越禍。
首先，江敬老知道許雪心大肚，就更加唔想走。方天心見唔對路，就建議不如搵巫日明（林彬）老婆，懷左孕嘅劉多多（林艷）幫手，搞互換身份。
紙包唔住火，本來江德信都以為老婆真大肚，當知道係流料，加上江敬老好得閒，決定等埋BB仔出世先番歸，情況變得好大鑊。一向多計嘅江德信，諗到不如串通根本唔想嫁佢，做護士嘅葉滿枝，喺醫院搵個相鄰病房，等許雪心同劉多多隨時偷龍轉鳳，呃晒會嚟睇BB同產婦嘅兩邊家長。
到中後段醫院戲，係高潮所在。所有前面老作嘅大話同誤會，到呢處逐一穿煲。 總之每個人為左補鑊，前言不對後語，喺兩間病房走嚟走去，搞到亂七八糟。
楚原技藝叻嘅地方，係活用幾個簡單場景，包括，醫院上層、下層；電梯到走廊；兩個病房距離。然後透過人物進出場景嗰陣，製造時間上誤差，將緊湊、慌張，唔知點算好嘅喜劇效果，逐漸累積，再累積，繼而一次過引爆。
技術上，連計頻繁嘅反應鏡頭，醫院戲嘅剪接點，超過一百七十個。所有演員走位、調度，成場無停。甚至同場演出人數，多起嚟去到二十人，將畫面塞到滿。
就咁睇，都唔好講拍，嗰種複雜、瑣碎嘅程度，無番咁上下功力，根本頭都暈埋。加上楚原玩細節好強，除左原來主線部份，整套戲，佢仲插入唔少枝線，協助將喜劇效果推至盡可能大。
比如八公（高魯泉）嫌棄八婆（馬笑英）無仔生，所以佢又想娶多個，而原來八公搵嘅，又係葉滿枝老母，即係八公會同江德信爭女。而阮地龍（俞明）個懵仔，就扮流氓同醫生，越幫越忙。加埋大炮王，方天心、龍太太（羅蘭）兩個即興作故仔，直情亂吹一通，笑死。
楚原仲玩嘢到（神來之筆），無端端加個神經佬（林魯岳）逃獄戲，無厘頭得嚟，又好夾部戲已經瘋狂嘅狀態。
所以，趕歸趕，楚原落足料搞，務求做到喺娛樂上，滿足晒入場觀眾。
雖然同上集一樣，玩講大話、玩誤會、玩錯摸，但其實以「生仔」做主題嘅下集，所謂「不孝有三．無後為大」，不過係借題發揮。
楚原用左兩代人（江敬老／江德信、許雪心）去寫：新一代同上一代之間，對將來，或者點選擇自己嘅生活，有意願上分歧、矛盾、甚至衝突。但係年青一代，無採取到完全嘅對抗，而係想辦法，先安撫難以調和嘅分別。
前設係，唔好令老人家傷心，然後再諗計，有無雙方都滿意嘅結果。
講番轉頭，於我，其實《大丈夫日記下集》開場無耐，許雪心訓誡佢七歲個仔家樂，第日要識得孝順，尤其好錫佢嘅阿姨方天心。呢部份，好值得深思。
家樂番寄宿學校，每星期只番屋企一次，每次父母都預備好佢一星期需要嘅衣服同食物。對比起昔日粵語片裡面嘅小朋友，家樂幸福得多。但係同時，家樂因為寄宿，會離開屋企。期間大部份時間，家樂成長所出現嘅問題，就要自己面對。雖然佢著住一套西裝仔，好企理、乾淨，但係父母一代嘅原則、思想，就未必再解決（解釋）到，佢個人，以至外面世界嘅急劇變化。
延伸呢個聯想，究竟家樂會點踏入70、80年代呢？佢會變成一個咩人呢？家樂爸爸、媽媽兩個，同上一代嘅關係，發展到佢身上又會點呢？家樂父母，解決江敬老問題嘅方法，就係未得同意就將佢過繼比人，孝順嘅意思，係咪呢啲情況唔好拒絕，要聽話呢？甚至將來，家樂仲記唔記得有個好錫佢嘅阿姨？定抑或，佢會親阿姨比阿媽更加多呢？
正如開場之後家樂就再無出現，佢嘅未來，係另一個時代。
諗一諗，的確耐人尋味。
轉下眼，「大丈夫」去到88年，用筆寫日記都費事。傳統家庭觀念早已經崩潰。從前長輩嘅地位、意願，甚至角色都完全消失。幸福嘅指標、榜樣，係有幾多部車，有幾多層樓，有幾多個女人。所以打洋行工嘅江德信，尚算老實嘅性格、人品，唔會喺88年嘅中環生存到。換嚟嘅，係渴望左擁右抱，做股票嘅周正發（周潤發）。而許雪心代表嘅64年女性，能夠留低嘅，就只有演員南紅個名，同倒退至附加於大男人底下嘅賢淑。
沒有留言:
張貼留言