「大丈夫日記」有三部，都係楚原導演。
頭兩部1964年推出。5月先有《大丈夫日記》（上集），由張英才、丁瑩、林彬、林艷主演。然後12月有《大丈夫日記》（下集），演員基本上一樣，不過女主角由丁瑩換左南紅。24年後，1988年徐克監製《大丈夫日記》，當時由「新藝城」出品、「金公主」發行、「電影工作室」攝製，周潤發、葉蒨文、王祖賢主演。睇牌面係全盛期嘅港產片陣容。
三部「大丈夫日記」都有特色同代表性。數番轉頭，楚原生於1934年，64年30歲，如果由1956年參與吳回導演嘅《一片飛花》（楚原編劇）計起，22歲之後8年，楚原嘅粵語片成績單已經好利害（共28部電影！），比如編劇有56年《七重天》（吳回導演）、58年《奸情》（王鏗導演）同《紫薇園的秋天》（秦劍導演），又有60年《可憐天下父母心》（楚原編導）、62年上下集《孽海遺恨》（楚原導演）、63年《含淚的玫瑰》（楚原編導）同《昨夜夢魂中》（楚原導演）。所以，到64年導演兩部「大丈夫日記」嘅楚原，技巧已經好熟練流暢，而且活潑、靈活，作風新派新潮。
今日睇番《大丈夫日記》（上集），証明楚原寫人物係有一手。例如一開場，主角江德信（張英才）個人已經好唔「大丈夫」，連屋企個工人都兇到佢。不過反過嚟講，江德信係一個好人，而且無咩脾氣，亦好愛屋企同老婆許雪心（丁瑩），甚至朝早番工會揸綿羊仔，車埋老婆一齊遊車河。
觀眾睇到嘅「大丈夫」唔係要勁要惡，而係對一家之主所謂嘅尊嚴做左諷刺（張英才先做到）。當然從背景（靚裝嘅屋企）到日常生活（較為洋化）可以睇到主角階層有一定經濟條件。所以角色嘅煩惱、情趣唔係為搵兩餐，而係點樣喺現代都市嘅白領生活裡面，維護到已經有嘅關係，化解到比如夫婦、朋友之間，可能出現嘅誤會同危機。
江德信喺洋行打工，同另外三個同事合稱「四劍俠」，包括周麒麟（鄭君綿）、阮地龍（俞明）同巫日明（林彬）。聽落以為「劍俠」好勇，其實睇佢哋個名就知流流地，呢個組合都係撞板多，而且一有事會好騰雞，會腳軟。江德信好得老闆龍雙田（姜中平）重用。姜中平做上司，都知點會正經，梗係多衰野做同好想鹹濕。佢重用江德信，因為條友腦筋轉得比較快，信得過，有鑊要補會諗到橋。
《大丈夫日記》（上集）故事圍繞嘅，就係老闆要請個「日本女」見客，專認女朋友多嘅周麒麟傻下傻下搵左個多多生子（林艷）頂檔，而多多生子不單唔係「日本女」，仲曾經有好慘嘅遭遇，加上溝唔到女嘅巫日明好鐘意多多，所以「四劍俠」要諗辦法頂住老闆想鹹濕，又要保住份工，而最後更幾乎搞到許雪心要同江德信離婚。
呢種老闆要滾女嘅故事粵語片唔少，不過楚原就強在細節同心思，比如戲中太太團有個「防止丈夫走私委員會」，甚至會發明一對鞋，會聽到夜歸男人腳步聲，叫「半夜三更鞋」。太太團嘅大家姐係龍太太（羅蘭），佢聽聞「日本女」多多生子插花勁叻，所以要佢教太太團花道，而周麒麟唯有扮識日本話頂做翻譯，幫多多亂嗡一輪，同時惡女方天冰（李香琴）又懶識野，接周麒麟再亂嗡「日本女」嘅插花藝術，成場戲好好笑，無冷場咁滯。
呢種混淆真真假假，誤會再誤會嘅玩法，甚至玩到連龍雙田屋企樓下個印度看更，原來都唔係印度人。
楚原眼中嘅城市，雖然無迫良為娼或者惡霸橫行，不過人為左保護自己，變得真偽好難去分辨。
到後段高潮戲，眾角色因為時間巧合，撞見多多同江德信喺酒店似乎有奸情。許雪心睇到，嬲到眼淚汪汪，仲摑左老公轉身走。成個戲由信任老公，到無辦法唔懷疑，中間許雪心點唔開心，都無喊過，到左人証物証江德信出軌，先至心碎流淚。
楚原從戲嘅開場就已經建立左江德信好錫老婆，所以高潮戲除左緊張又好笑之外，重點係個爛攤子搞喊左個咁信你嘅女仔，好唔得掂。
《大丈夫日記》（上集）用一個跌低嘅電話做最後一個鏡頭，而成套戲穿起種種事件就係電話頻繁嘅往來，呢個亦係楚原（敏感）聰明嘅地方。城市發展嘅進步象徵就係改善通訊速度，本來訊息傳遞快左係一種方便，但係同時家庭生活亦因為內與外嘅通訊距離縮短，而變得相聚時間無辦法延長。所以風波過後，江德信同許雪心兩公婆，會攬到實一實，電話都費事聽。
累積起豐富電影經驗嘅楚原，7個月後推出《大丈夫日記》（下集），一方面沿用人物嚟續寫之後發展，另一方面亦將錯摸喜劇，通過密集嘅群戲調度推至高峰。雖然下集換走多一份孩子氣嘅丁螢，改用南紅做許雪心，但因為戲軌圍繞娶平妻、生仔教仔，南紅嘅賢淑同母性相對比丁螢更加適合，畢竟兩夫婦要聯手講大話，有時鼓埋泡氣嘅丁瑩雖然可愛，但係就未必幫到付付碌碌嘅張英才。
沒有留言:
張貼留言