《大劫案》

2012年8﹣11月期間，「粵語片研究會」同「電影資料館」合作，策劃以佈景師為主題節目『大佈景師陳其銳．陳景森父子相輝展』。內容包括展覽、作品放映＋映後談、主題講座等等。為能夠較為全面探討「陳其銳．陳景森父子」兩位佈景師創作過程，選映片目涉及早期國、粵語片，後延伸至邵氏、嘉禾電影都有。「粵語片研究會」成員曾肇弘（ERIC）喺 8月26日放映《大劫案》之後主持映後談，分析影片拍攝背景、內容，以至比較同樣以劫匪做題材，1960年「中聯」時期，李鐵導演力作《我要活下去》之間嘅關係。

因為受 ERIC分享所啟發，我喺 8月27日用 FACEBOOK 寫低有關《大劫案》筆記。

粵語片研究會嘅Eric喺《大劫案》（楚原導演，1975）映後談裡面，選段放映番《我要活下去》（李鐵導演，1960）其中一幕，用嚟比較兩部片嘅一段父子關係，之後諗番真係幾有意思。

兩套戲相隔15年，人心同時代改變好大。《我要活下去》裡面個仔做賊係生活迫人，老豆就勸佢做得出唔怕認，要有骨氣同相信對與錯嘅價值，最緊要知道回頭是岸，而且要對未來抱有希望。

而《大劫案》嘅父子，老豆係正派老差骨，喺嗰陣會拒收黑錢之類，戲中一直追捕緊劫匪。而個仔就係賊頭兼個人極心狠手辣，佢最後都無咩悔意，理由係個老豆咁正直，咁正義梗係得個做字，人人收黑錢都發，佢就無咩得著，所以為咗一家人嘅將來要做單大嘢，累死其他人都無咩所謂，反正個世界個個都咁衰，佢衰埋一份有咩錯。

結果老差骨頂唔順個仔咁諗咁做，開槍射瓜佢。

李鐵鏡頭下，係上一代喺艱苦生活條件底下嘅生存掙扎，當時粵語片相信人窮志不窮，鼓勵做人要有腰骨，講信用講道義，要相信人，要相信公道公正。只要把持住信心信念，就可以抗拒不擇手段去奪取利益呢條歪路。

而去到《大劫案》，睇得到楚原喺非常近似嘅架構上面，更新咗人物嘅動機同背景，企圖拉近電影要表達嘅嘢同時代嘅關係，佢好用心機去做，去為故事著色落墨，但係亦明顯見到，導演嘅角度，評估甚至評價人物嘅原點係來自從前社會一啲判斷，呢啲判斷放喺1975年似乎好難應付香港嘅變化，比如裡面一個反叛少女嘅角色，佢嘅家庭背景同生活態度係一種先定案再寫嘅方法，而且佢嘅行為睇嚟我哋會叫墮落，最終就算搵到佢所講嘅愛，角色都要用死嚟結束，似乎佢嘅結果要對佢嘅不當生活付出代價先合理（原則上，佢無太壞嘅事做過，只係用性去報復佢嘅階級。）呢點係若干程度上，未必解釋到當經濟走入另一階段底下嘅香港社會，尤其土生土長嘅一代，佢哋睇生活同面對生活嘅方式其實同上一代好唔一樣。

例如現實情況係，兩代之間對寂寞嘅感受同理解已經好南轅北轍。

所以喺《大劫案》最後一幕，老豆殺死個仔，嗰種無力、無法理解同無助，同《我要活下去》裡面嘅父子描寫構成好大落差，後者強調嘅係，通過真摯關懷同體諒，人與人係可以理解對方，明白對方，亦唔需要步向毀滅咁悲觀。而前者就剛好相反，因為兩代溝通已經唔能夠做到，就好似個仔尾段一個人用耳筒聽音樂咁，決定係自己嘅，個人嘅，點樣生活同享受都好個人嘅事。

在我嚟講，老差骨就好似導演自己，佢無辦法理解，無辦法解釋眼前現實，只能選擇毀滅。而佢呢個想法嘅前設係：從前個世界唔係咁樣嘅。

諗真，無論套戲、導演本人同如何面對時代發展，其實都有悲哀、悲涼嘅心境喺裡面。

呢套戲幾有趣，亦重要，先做啲筆記，要睇多一兩次再諗下。