毒戰﹣1
聽講香港票房唔係咁好，加上今日有空檔，嗱_嗱聲去左睇「毒戰」。
好肯定，呢部係有合拍片以來最重要嘅電影之一。佢嘅角度同世界觀，以至極簡潔嘅對白同內容，講左難以理順道盡，而且相當複雜嘅中港關係。
我個人覺得，想唔到杜氏風格寫嘅人物（尤其差佬）放左喺大陸背景，原來會出現左一種好耐人尋味嘅效果，同好多聽番嚟睇法剛剛相反，當戲去到二十分鐘度，我已經唔會將裡面嘅禁毒大隊同執行法律嘅機關掛鉤，佢哋只係另一種勢力，同樣好似上左毒癮一樣行動，毒品喺裡面嘅象徵性大過毒品本身，實際上毒就好似碼頭嘅船一樣，係一種準備擴散開去嘅狀態。最後一場槍戰，就算同「非常突然」貌似，我亦認為完全唔一樣，因為複雜太多，古天樂呢個香港人角色去到呢一刻變得好曖昧，佢為左生存而用盡手段嘅處理，觀眾似近又遠，而且命運注定失敗。
犀利，睇多次再諗下。
寫於2013年4月20日FACEBOOK
毒戰﹣2
由於有朋友再次提起「一代宗師」，我想表達下就呢部片同「毒戰」之間一D粗略嘅比較同分別。兩部片我都只係睇過一次，所以唔仔細，極其量係個初步印象。
我嘅睇法，「一代宗師」同其他王家衛電影一樣，導演係將歷史抽取左某D部份進行重構，而呢個選擇嘅前題係，抽取嘅部份有邊D可以納入佢對記憶嘅解釋，王導對過去事物嘅理解，係注重時間差嘅錯開所帶嚟嘅失去，亦即係舊人舊事已經過去左，失落左，番唔到轉頭呢種感慨情緒。佢係用呢個方法嚟睇當代，所以氣氛、美術、攝影等都傾向係一種思憶、懷舊，最終呢種寫法由佢手令人物同時代演繹成愁容同浪漫，而對外在現實嘅描寫係唔需要，因為呢種追憶、回憶非常局部，主觀，亦唔需要宏觀視野去成立（他日出碟，粉絲應該細心睇下，其實部戲好散，好唔統一，好多鏡頭無心機去諗，比如打戲嘅層次同拍攝手法，處理係失衡、平凡甚至矛盾重重。）
而最重要係，「一代宗師」係講過去，而講嘅方法唔需要同現實當下接軌，佢抽空左客觀，將世界變成好局部嘅嘢，包括視覺上所經營嘅畫面都極少極少拉闊。
相對「毒戰」，先唔好講喜唔喜歡，好唔好，而係作為一部用現下中國做背景嘅電影，佢刻意觸碰最敏感嘅部份，甚至乎，我認為佢對執法者形象用咁嘅寫法（比如勇猛得去獨闖龍潭之類）係一種偽裝，因為佢對呢D人物嘅極簡潔描寫，將行為同目的變得抽象，難以確定，禁毒大隊代表嘅究竟係一種道德觀、單位指示定係其他原因_嘅詮釋空間好闊。甚至落手扣嘅目的、意義究竟係咪繩之於法都變得相當具解讀嘅可能性。比如呢班極之執迷殲滅嘅團體，套落成為「暗花」洪先生手下一樣得。導演將行為，包括權力、欺騙、乞求、不擇手段等擺到最前，而鬥爭嘅給果就係撕殺至一個不留，再加上結未主角嘅求生方法完全違反佢作為核心人物應該有嘅成份，最低限度去到個一刻我要反思認唔認同佢，而且我亦分唔到呢個人邊句真邊句假。我只係知佢唔想死，只要唔駛死乜都得。
要記得，杜琪峰唔係善男信女，佢係類型片嘅範疇幾賣座嘅戲都拍過，佢喺形式同內容嘅實驗自銀河創作開始無停過。
「毒戰」呢個取態講出左佢對中港關係，包括以類型片為強項嘅香港電影工業，擠身中國市場嘅角色、功能同潛力有幾多留得低。
暫時我有咁嘅感覺。「毒戰」好似問左一條好有迫切性嘅問題，而且可能出現嘅答案相當悲觀：再咁落去，只有攬炒。
寫於2013年4月21日FACEBOOK
毒戰﹣3
創作最令人沉迷同抽唔到身放棄嘅原因，無論係創作者本人定係睇嘅觀眾，其實係透過_創作（或觀_賞）發展（加想像）裡面嘅可能性，可讀性呢點。
可能性、可讀性嘅探索令到作品引起討論，產生能量同生命。
喜歡早期嘅王家衛係因為佢為港片注入左少見嘅可讀性（等於我未必神往「阿飛正傳」最後嘅梁朝偉，但係永遠記得劉嘉玲同張曼玉嘅一場爭執，港片極少睇得咁清去講情傷同復元。）喜歡中後期嘅杜琪峰係因為佢為類型片發掘可能性，而唔係做番轉頭（到現時為止，我認為只有佢思考過真正嘅時代需要，同點樣從類型當中反類型。）兩位電影人都係叻人，但係我睇唔到王導有新嘅角度去探索藝術創作（唔使講遠，你對比早逝嘅楊德昌，佢每次都有野心去超越自己，成唔成功係另一個課題，）甚至技巧亦走到盡頭（花巧嘢唔及「春光乍洩」，文戲連「旺角卡門」嗰隻都無埋。）
如果「毒戰」有佢唔好嘅地方，應該討論佢點樣唔好，或者係邊處唔成功（亦要留意佢係失手定係專登），但係放喺一個大視野嘅框架，佢嘅膽識唔係一般講下粗口，而係踩住條界嚟行（等於落少少背景描寫，咁禁毒大隊同古天樂就會完全唔同晒，如果你話佢無做，所以唔好，咁你諗番「PTU」、「大事件」、「神探」、「暗戰」、「放逐」等等就知，佢隨手都做到，但係銀幕呢個版本無。點解呢？）如果你話個結尾同差佬形象擦大陸鞋，咁就更加可圈可點，第一，我睇唔到呢班差佬係定義上嘅正派（差佬頂籠係佢身份），第二，我唔覺得處刑係重要（判刑都係得幾句），反而主角嘅狀態值得研究，點解呢個人會咁呢？（佢之前流眼淚感情係真定假，還是佢係跟住事態做左犧牲所有人保命嘅賭注。）
我未睇過一部合拍片咁寫主角，尤其裡面嘅灰色地帶，似乎有幾多空間可以留白就用到盡為止，然後留比睇嘅人去諗同填充。
作為觀眾（我認為我係好有要求嘅觀眾），部片收幾多唔係我關心嘅嘢（唯一可以做嘅就係買飛翻睇）而係佢做左一部好唔一樣，空間好闊，_踩線嘅香港電影。
＊可惜再無全盛期嘅「電影雙周」，如果唔係，應該會有研討會討論。
＊最後一提，今屆電影金像獎係最慘不忍睹嘅盛事之一。完了。
＊圖片：「放逐」
寫於2013年4月21日FACEBOOK
毒戰﹣4
《非常突然》_對角色係落左筆墨去描寫，裡面嘅團隊，尤其差佬係有明確嘅人物關係，以至感情線等等都有部署，觀眾透過戲劇認識左裡面嘅角色，知道佢哋為人，尤其係道德觀。我哋多少都清楚呢D角色個人品喺點。
另外，每個提出《毒戰》同《非》嘅類比，全都集中結局嘅毀滅，但係兩者扭橋嘅方式同成份唔同。《非》主要集中差佬追捕一班應該係好堅嘅賊，同時副線又有一班表面好流嘅賊，當專業、團結而且謹慎嘅差佬隊冧左「堅嘢」之後，竟然因為疏忽、輕敵同隨便，俾班「流嘢」搞掂。
《非》_嘅創意喺呢處，佢逆反左類型片對角色形象嘅建立（加上雨水同陽光做成嘅反諷）令結局出奇不意多左內容，所謂生命無常，除左意外，重有好多涉及人性嘅原因導致。
如果《非》嘅毀滅同錯愕，最終有帶嚟對無常嘅感嘆，咁係因為我哋認識過裡面嘅人物，知道佢哋曾經為感情、友情同戀愛煩惱過，認同過_佢哋感受，人物同觀眾之間有過交流。
但係《毒》係另外一種，無論係禁毒大隊定係古天樂呢邊，佢刻意令觀眾對了解人物背景、動機、性格等，保持一段認知上嘅距離，呈現嘅絕大部份只係環境、行為。
而最重要係，《毒》嘅啟發，作為一部香港電影（《毒》比任何叫合拍片嘅香港電影更香港電影），佢用類型片嘅格局（亦包含左合拍片要求嘅「道理」）將註釋權通過留白釋放左。
所以《毒》最終警匪毀滅，本質上、意義上、處理上（編排同調度嘅變化），同《非》嘅效果完全唔一樣，
＊如果寫香港人係毒販，就認為係帶有污損嘅奉承，咁香港真係出現好嚴重嘅精神危機。唔好講套戲，自問香港、以及香港人本身真係咁清白清高咩？尤其改革開放之後，佢嘅歷程、代價同結果，香港人真係一D責任都無咩？
寫於2013年4月23日FACEBOOK
沒有留言:
張貼留言